Jallikattu chungchanga Supreme Court thutlukna siam hun titlai

Tamil Nadu state chhung hmun hrang hrangah Jallikattu sports khapna hlih phuta nawrh huaihawt mek a nih avangin, Supreme Court chuan hemi chungchanga thutlukna a siam hun tur chu a tikhawtlai.

Chennai-a Marina Beach-ah Jallikattu hman phalsak phutin mi 10,000 chuang zet chuan nawrh an huaihawt mek a, nawrh huaihawt hi boruak ṭha tak hnuaiah kalpui a ni a, buaina chhuak leh harsatna lian tham siam an awm lo.

Jallikattu chungchanga Supreme Court thutlukna hi nimina tihchhuah tura tih kha a ni a, mahse judge-te hnenah court thupek puanchhuah a nih chuan state chhungah buaina a chhuah mai a hlauh­thawnawm nia hrilh an ni.

Tamil Nadu Chief Minis­ter O Panneerselvam chuan Jallikattu hman phalsak leh tur hian Prime Minister Narendra Modi pawh Delhi-ah dawr tawh a ni. CM chuan Jallikattu chu Tamil culture-a bet tel a ni tih a sawi a, kum 2014-a Surpeme Court-in a lo khapsak tawh chu hman chhunzawm a nih theih nan, state sorkar chuan executive order emaw, ordinance emaw a siam dawn tih a sawi. Marina Beach-a pungkhawmte pawh an nawrh titawp turin a ngen nghal bawk. Mahse pungkhawmte chuan thupek hi tihchhuah a nih hma chuan nawrh tihtawp an tum lo tih an sawi.

State sorkarin executive order a siam hi President Pranab Mukherjje-a'n a pawmpui hnuah, Tamil Nadu Governor-in a pass a ngai dawn a ni. He thupek siamah hian Jallikattu-a infiamna atana hman, bawng an hmante rawng taka nghaisak an ni tur venna turte pawh duan tel a ni.