State/UT te kutah Covid vaccine dose vbc 18 chuang awm

Union ministry of health and family welfare chuan state leh Union Territory-te kutah Covid-19 vaccine dose vaibelchhe 18.15 a la awm tih a sawi.

Thuchhuah a siamah Ministry chuan, sorkar laipui chuan direct state procurement category hnuaiah state/UT-te hnenah hian a thlawnin Covid vaccine hi dose vaibelchhe 293.53 a pe chhuak tawh tih a sawi. Heng zingah hian la hman loh, dose vaibelchhe 18 chuang chu state/UT te hian an la kawl mek a ni.

"Ram puma vaccine pek runpui kalpuina hnuaiah, sorkar laipui chuan state/UT-te chu puiin, Covid-19 vaccine chu a thlawnin a sem a ni. Covid-19 vaccination drive thawh tharah chuan, sorkar laipui hian state/UT-te hnenah vaccine siamtute vaccine siamchhuah aṭanga 75% chu laksakin a thlawnin a pe chhuak leh dawn a ni," a ti.

Ministry-in data a tichhuahah, nimin zing dar 7 thleng khan ram pumah Covid-19 vaccine dose vaibelchhe 190.5 pekchhuah a ni tawh. March 16 aṭanga pek chhuah ṭan, naupang kum 12-14 inkar zingah pawh vaccine dose khatna la hi mi vaibelchhe 3.06 an awm tawh a, dose hnihna la vaibelchhe 1.02 an awm tawh bawk.

Kum 15-18 inkarah vaccine dose khatna hi mi vaibelchhe 5.87 in a la tawh a, vaibelchhe 4.33 in dose hnihna an la tawh.