Modi-a'n India pahnih a siam - Rahul Gandhi

Congress party hruaitu Rahul Gandhi chuan prime minister Narendra Modi chu India pahnih, mi hausa tan bik leh mi retheite tan a siam nia puhin, India ram hausakna chu mi hausa tlemte kuta pek a ni, a ti.

Gujarat assembly inthlan neih tur atana Gandhi hian tribal Dahod district-te party campaign chu nimin khan a hawng a, inthlan lo awm turah hian Congress party chuan hnehna an chang ngei dawn niin a sawi.

"Kum 2014 khan Narendra Modi chu India ram prime minister a ni a, hemi hma hian Gujarat chief minister a ni ṭhin. Gujarat-a a hnathawh dan chu ram pumah a rawn hmang zui a, Gujarat Model tiin an vuah a ni," tiin Gandhi chuan a sawi. "Tunah chuan India pahnih a din a, pakhat chu mi hausa, thlan bik tlemte, sum leh thuneihna sang tak neite tan. A dang pakhat chu mi rethei zawk, mipui nawlpui tan a ni," a ti.

Congress party chuan India pahnih awm chu a duh ngai lo a ni tih Gandhi chuan a sawi a, "BJP kalphungah chuan ram hausakna te, tui, ramngaw leh khawmual, tribal leh midangte ta ni ṭhin chu mi hausa, mi tlemte hnenah pek a ni," a ti. BJP kaihhruai sorkar chuan Gujarat-a tribal-te dikna chanvo neihte chu a namnul sak tih a sawi bawk.

Covid hri leng chungchanga PM Modi thiltih dan chu Congress hruaitu hian a sawisel bawk a, "Hripui len laiin Prime Minister chuan in balcony-ah in bungbelte khawng ri a, in mobile flast light-te ti eng turin a ti cheu a, hetih lai hian Gujarat-ah hian hri vang hian mi nuai thum zet an thi si a ni. Ganga luiah mitthi ruangte paih a ni a, hri leng vangin India ramah mi nuai 50-60 inkarin nunna an chan a ni," a ti.