Singapore-in 'The Kashmir Files' tihchhuah khap

Singapore chuan Kashmir-a Hindu-te chunga tawrhna thleng chungchang tarlanna, sawi zui hlawh tak 'The Kashmir Files' film chu sakhaw inkara inhuatna thlen thei nia sawiin an rama tihchhuah a khap.

'The Kashmir Files' hi Kashmir-a Hindu-te tawrhna leh an tlanchhiat dan chungchang tarlanna a ni a, prime miniter Narendra Modi bakah Hindu nationalist-te chuan he film hi nasa takin an fak a, box office lamah pawh a hit zui hle. Mahse sawiseltu lam chuan he film-ah hian thil thlen dan dik tak tarlan a ni lo a, Muslim huatna lam hawi an uar zawk niin an sawi. A takah chuan Hindu chauh ni lo, Muslim-te chungah ngei pawh tawrhna hi a thleng niin an sawi.

Singapore sorkar chuan thuchhuah siamin, "He film-ah hian Muslim-te chungchang leh, Kashmir-a buaina thlengah Hindu-te tawrhna thlengah thlir dan kawng khat chauh a tarlang a ni," a ti. Hetiang zawnga thiltih hian sakhua leh hnam inkarah inhuatna a thlen thei a ni, tiin a sawi. Singapore hian hnam leh sakhaw inkara inhuatna thlen thei zawnga thiltih hrem theihna dan khauh tak a nei a ni.