AP CM hlui lakah FIR thehlut

Andhra Pradesh chief minister hlui, Telugu Desam Party (TDP) hruaitu ni bawk Chandrababu Naidu chu Amaravati-a Inner Ring Road siamnaa thil dik tawk lo awm nia sawi kaihhnawihah a lakah FIR thehluh a ni.

Thawhṭanni khan Andhra Pradesh CID chuan complaint an dawn behchhanin Naidu lakah FIR hi an ziaklut.

Hetih lai hian TDP sorkara minister hlui, P Narayana chu question paper putru kaihhnawihah AP police-te chuan an man bawk. Police-te hian question paper putru chungchangah hian school eng emaw zata headmaster leh zirtirtute an man bawk a, an zingah hian Narayana group enkawl school-a thawkte pawh an tel. Minister hlui Narayana hi Narayana Group of Institutions-a chairman a ni.

April 27 khan YSR Congress MLA Alla Ramakrishna Reddy chuan Amaravati Master Plan leh Inner Ring Road siam chungchangah thil dik tawk lo a awm tih sawiin, CM hlui Naidu, minister hlui Narayana leh midangte lakah complaint hi a thehlut a ni. FIR-ah hian CM leh minister hlui bakah Lingamaneni Ramesh, Lingamaneni Venkata Surya Rajasekhar, LEPL Projects, leh Ramakrishna Housing Pvt Ltd director Anjani Kumar-te hming pawh ziahlan a ni bawk.