Uttar Pradesh : SP leh Congress-in thawhdunna tur tifel

Uttar Pradesh assembly inthlan neih turah, rorellai Samajwadi Party leh Congress Party-te chuan thawhdunna tur tifelin, seat insem dan turah pawh an inrem tawh.

Party pahnihte hian an thawhdun tur thu hi a hmain lo sawi tawh mah se, seat insem danah an inrem mai thei lo a, mahse kar kalta Inrinni khan inremna an siam thei ta a ni.

Samajawadi party chuan assembly seat 403 awm aṭangin, Congress party hi seat 99 pek a remti a, mahse Congress party chuan seat 110 a phut thung. Seat insem dan turah party pahnihte hi an inrem mai thei lo a, hei vang hian Inrinni khan Congress Party President Sonia Gandhi chuan SP hotu, Akhilesh Yadav a bia a, hemi hnu hian Congress tan seat 105 dah turin an inrem thei ta a ni. SP hian seat 298 a chang thung dawn a ni.

Uttar Pradesh assembly inthlan hi February 11 aṭang ṭanin, thawh sarih-a neih a ni dawn a, March 11-ah vote tlate chhiarin result puan nghal a ni ang. Inremna an siam thei tak avangin, SP-Congress thawkdun hian SP hotu, Chief Minister Akhilesh Yadav-a hona hnuaiah inthlan hi an chuh dawn a ni.

State-a rorellai, SP chuan nimin khan an party manifesto an tlangzarh. CM Akhilesh Yadav-a’n manifesto hi Lucknow-ah a tlangzarh a, state hmasawnna tura scheme hrang hrang siam an tumte a tarlang. Akhilesh chuan an state hmasawnna chu an ngaih pawimawh hmasak ber a nih thu a sawi a, thu a sawi ringawt aiin a taka hna thawh chu a au ring zawk a ni, a ti.

SP manifesto tlangzarhah hian zirlaite hnena a thlawna laptop sem te, Kanya Vidya Dhan, Samajwadi Pension siam te, Purvanchal Expressway siam te, Janeshwar Mishra model village din te bakah, police leh hmeichhiate puala helpline ṭha zawk siamte a tel a ni.

Sorkarna siam leh tura SP thlang tling leh ngei tura mipuite ngenin, Akhilesh chuan an party chuan kum 2012 manifesto-a an thutiamte pawh an tihlawhtling vek tih a sawi a, SP sorkar chuan kum nga kalta chhung khan state hmasawnna leh mipuite hamṭhatna tur scheme hrang hrang a siam tih a sawi.

Samajwadi Party chuan sorkarna an siam leh a nih chuan primary school-a zirlai, mi rethei chhungkua amite chu thla tin ghee litre khat leh milk powder pek a tiam a, kum khata cheng nuai 1.5 lalut pha lote chu free medical service a tiam bawk. Tar enkawlna hmun siam a tiam a, hmeichhiate tan bus fare 50% a tihtlawm sak a tiam. State chhunga thingtlang khaw tinah electric eng pek a tiam bawk.