AP-a rel chesualah mi 36 an thi

Andhra Pradesh, Vizianagaram district-a Jagdalpur-Bhubaneswar inkarah khualzin phur rel tlan a chesual a, mi 36 an thi a, mi dang 100 chuangin hliam an tuar.

Kar kalta Inrinni zan dar 11:30 vel khan Jagdalpur aṭanga Bhubaneswar pana a tlan laiin, Hirakhand Express hi Kuneru station bulah chesulain a let a ni. East Coast Railway Chief PRO JP Mishra chuan rel pindan 22 zinga pindan pasarih leh a engine a let niin a sawi. Chetsualna thlenna hmunah hian chhanchhuah hna thawktute tirh nghal an ni a, ruangte hi lachhuakin, hliam tuarte chu Parbatipuram leh Rayagada damdawi-inah dah an ni, a ti.

Rel chetsualna thleng vang hian Rayagada leh Vizianagaram kawnga tlan rel service a nghawng buai phah a, rel pathum tlan tur chu ṭhulh tir an nih bakah, adang pariat chu kawng dangah tlantir an ni.

Railway Minister Suresh Prabhu pawhin nimin khan rel chetsualna hmun a hi a pan a, thi chhungte hnenah cheng nuai hnih ṭheuh leh, hliam tuarte hnenah Rs 50,000 ṭheuh pek an nih tur thu a puang.

East Coast Railways thupuangtu, JP Mishra chuan rel chetsual dan hi chhuichian nghal a nih thu sawiin, report pawh thehluh thuai a ni ang, a ti.