SC-in sakhaw hmun atana ram pek chungchang ngaihtuah dawn
Supreme Court chuan private organisation hnena sakhaw hmun dinna tura sorkarin a thlawna ram a pek chungchang chu ngaihtuah ṭhat a remti.
Chief Justice JS Khehar leh Justice DY Chandrachud awmna bench chuan kum 1986-a Tamil Nadu sorkarin Chennai bul Ullagaram khuaa mosque sakna tura a thlawna ram, acre 0.27-a zau a pek chungchanga petition thehluh chu ngaihtuah a remti a ni.
Federation of Chennai Suburban (South) Welfare Association chuan Tamil Nadu sorkarin mosque sakna tura Madipakkam-a Muslim cultural association hnena a thlawna ram a pek chungchangah hian petition a thehlut a ni.
State sorkar chuan a ram pekah hian kum hnih chhunga mosque hi din a nih loh chuan a laklet sak thei ang a ti. Mahse petition thehluttute chuan sakhaw thil atana private organisation hnena ram pek chu ram danpui kalh a ni, an ti. Hemi hnu hian Madras High Court-ah a thlawna ram pek vang hian petition eng emaw zat thehluh a ni zui bawk.