Bihar-ah zu khap thlawpna lantir

Bihar Chief Minister Nitish Kumar-a kaihhruai sorkarin zu khapna dan a siam chu state mipuiten an thlawpna lantirin, kar kalta Inrinni khan patna-ah human chain an siam.

Patna-a human chian siamnaah hian CM Kumar bakah, a thawhpui RJD hotu Lalu Prasad, Congress leh eptu pawl BJP hruaitute pawh an tel. Bihar Chief Secretary Anjani Kumar Singh chuan khawvela human chain thui ber siam a nih thu sawiin, km 11,000 chuangah mipuite hian inkaiin zu khapna dan hman mek an thlawpna an lantir a ni, a ti.

Human chain siamte thla lakna atan hian satellite pathum, foreign satellite pakhat leh Indian Space Research Organisation ta pahnih, aircraft pali, helicopter pahnih leh drone 40 hman a ni tih official-te chuan an sawi a, mi vaibelchhe thum chuang an tel a ni.

CM Kumar chuan Bihar state-a mihring awm zat, mi vaibelchhe 11-12 aṭangin vaibelchhe thum chuang zetin zu khapna dan hman mek an thlawpna lantira an chhuak chu lawmawm a tih thu a sawi. Human chain an siama hlawhtlinna ropui tak an hmu chuan zu khapna dan lekkawhnaah pawh a pui dawn hle tih a sawi a, dan kalha zu-a sumdawnna kalpui luite dinhmun chu a khirh telh telh dawn a ni, a ti.