Chennai-ah nawrh huaihawt leh police-te innawrbuai

Jallikattu khap a nih avanga lungawi lohna lantira Tamil Nadu khawpui Chennai-a nawrh huaihawtte chu police-te’n hnawhdarh an tum a, mipui pungkhawm leh police-te hi an innawrbuai a, mi eng emaw zatin hliam an tuar.

Marina Beach-a pungkhawmte chuan police-te chu lung leh hmanraw dang hmangin an tawng a, police-te’n tiang leh tear gas hmangin mipuite hi an nawr zui a ni. Nawrh huaihawtte hian police motor leh Ice House police station an hal bawk a ni. He thil thlen hnu hian Marina Beach panna kawngte chu dan nghal vek a ni.

Tamil Nadu festival pawimawh, Pongal festival denchhena hman ṭhin, Jallikattu chu ransa chunga nunrawnna lantirna chi khat nia sawi a nih avangin khap a ni a, hei hi duh loin mipuite hian lungawi lohna an lantir a ni. State chhung hmun hrang hrangah lungawi lohna lantir a ni a, Chief Minister O Panneerselvam pawhin phalsak tura ngenin Prime Minister Narendra Modi pawh a lo hmu tawh a ni.

Supreme Court pawhin Jallikattu chung­changa thutlukna a siam turah sorkar laipui a inrawlh hnuin tikhaw­tlai a nih tur thu a sawi a, CM Panneerselvam chuan he infiamna hi Pathian­ni aṭang khan hman ṭan a nih theih nan state sorkar chuan ordinance a siam tih a lo sawi tawh bawk. Mipuite chu nawrh huaihawt titawp tawh turin CM hian a ngen a, mahse nawrh huaihawtte chuan Jallikattu neih remtihna thupek tihchhuah a nih hma chu nawrh tihtawp an tum lo tih an sawi a, state assembly chu Prevention of Cruelty to Animals Act siamṭha turin an phut bawk a, assembly hian nimin khan hemi chungchang hi ngaihtuah a tum a ni.

Hetihlai hian Pathian­ni khan state chhung hmun eng emaw zatah Jallikattu sport hi hman a ni a, Padukottai-ah chuan an bawng chaihin mi pa­hnih a pir hlum a, hmun dangah bawng chaihtu pakhat chu an inchai hah vangin a thi bawk. CM-in Alanganallur-a Jallikattu sport a hawng tur chu mipuiten an remti lo a, khapna dan nghet siamfel phawt an phut.