Union Budget pharh hun sawn tura ngenna hnawl

Supreme Court chuan u­nion budget pharh hun sawn hla tura ngenna thehluh chu a hnawl a, ruahman lawk ang­in February 1-ah budget hi pharh a ni ang.

Sorkar laipui chuan kuminah union budget pharh hun tur hi a sawn hma a, Janua­ry 31-ah Budget Session hi ṭanin, February 1-ah kum 2017-18 union budget pharh turin a ruahman a ni. Mahse February 4 aṭang hian state panga-ah assemby inthlan neih a nih dawn avangin eptu party-te chuan hei hi an sawi­sel a, BJP kaihhruai NDA sorkar chuan budget pharh tur hi dik lo takin remchangah a hmang thei a ni, an ti.

Advocate ML Sharma chuan budget pharh hun sawn hma chungchangah hian Supreme Court-ah public interest litigation (PIL) a thehlut a, sorkar laipuiin budget pharh a tum chu Model Code of Conduct palzutna a nih dawn avangin a hun hi sawn turin a phut. Mahse Chief Justice JS Khehar leh Justice DY Chandrachud-te awmna bench he thil hi dan lam inrawlhna tur a ni lo tiin a hnawlsak.

January 4-a Election Commission-in state panga-a assembly inthlan neih hun tur a puan hnu khan, eptu party-te chuan inthlan neih hmaa union budget pharh tum chu duh loin, Chief Election Commissioner Nasim Zaidi an hmu a, sorkar chu inthlan zawhah budget pharh tura nawr turin an ngen.

Congress hruaitu leh Rajya Sabha-a eptu hruaitu, Ghulam Nabi Azad chuan,”Kum 2012-a heng state panga-a assembly inthlan neih dawn vanga budget pharh hun tur eptuten sawn an phut pawh khan, Congress kaihhruai sorkar laipui chuan Februa­ry 28 aṭangin March 16-ah budget pharh hun hi a sawn mai a ni” a ti.

Hetihlai hian Finance Minister Arun Jaitley chuan sorkar thlavang hauhin, eptute chuan budget pharh tur chu an hlauthawng niin a puh a, tih ngei ngai nia sawiin, kum 2014 inthlanpui neih hma lawk pawh khan interim budget pharh a ni tho a ni, tiin a sawi.