Union Budget Inthlanna tur state tana scheme puanzar phal lo

Sorkar laipuiin February 1-a union budget pharh tura a ruahman chu Surpeme Court chuan kaltlangpui a phalsak a, mahse he hun hi BJP kaihhruai NDA-in in­thlanna neihna tur pang­a-a vote zawnna remchangah a hman lohna turin, budget-ah hian state panga-a sorkar laipuiin mipui hamṭhatna pekna tur scheme leh sorkarin hmasawnna tur hna a lo thawh tawhte tarlang tel lo turin Election Commission chuan a hriattir.

February 4 aṭangin state panga - Uttar Pradesh, Punjab, Uttarakhand, Goa leh Manipur-ah assembly inthlan hi ṭan a ni dawn. Sorkar laipuiin assembly inthlan dawn hnaivai taka union budget pharh a tum hi vote zawnna hun remchangah a hman an hlauhthawn thu sawiin, eptu party-te chuan budget pharh hun sawn hla tur hian an lo ngen tawh a ni.

Mahse Supreme Court chuan budget pharh hun sawn hla tura ngenna hi a hnawlsak. Hemi hnu hian Election Commission chuan sorkar laipuiah lehkha thawnin, inthlana felfai leh thianghlim tak a awm theih nan, assembly inthlan neihna tur state tana scheme siam te chu puangzar rih lo turin a hriattir a ni.

Budget speech sawitu tur Finance Minister Arun Jaitley-a pawh, a thusawiah state panga-a sorkar hnathawh leh, hlawhtlinna hrang hrang a neihte a sawilang tur a ni lo, tiin Commission chuan a hriattir bawk.