CBI-in Kingfisher hnena loan pek kaihhnawiah mi pariat man

Central Bureau of Investigation (CBI) chuan sumdawng Vijay Mallya-a airlines tluchhe ta, Kingfisher Airlines tana loan, cheng vaibelchhe 900 pek a nih kaihhnawihah mi pariat an man. Man zingah hian IDBI Bank chairman hlui Yogesh Aggarwal leh, airlines CFO hlui A Raghunathan-te an tel.

CBI chuan IDBI Bank deputy managing director hlui OV Bundellu leh official pahnih, SKV Srinivasan leh RS Sridhar te, KFA executive Shailesh Borkar, AC Shah leh Amit Nadkarni te an man bawk a ni.

Thawhṭanni khan CBI hian he thubuai kaihhnawihah hian hmun 11 an dap a, Bengaluru-a Malyya-a chenna UB Towers te, Yogesh Aggarwal-a in leh Raghunathan in pawh an dap tel.

Kum 2015 Julythla khan CBI chuan bank loan leiba tam tak nei mek, Vijay Mallya-a lakah hian FIR a ziaklut a, hetah hian IDBI Bank-in loan cheng vaibelchhe 900 a pek chungchangah bank officer ṭhenkhat chuan dan kalhin duhsakna hleihluak takin an lantir niin a tarlang. CBI chuan bank official leh KFA-te inthurual dante, Mallya-a’n a loan lak dik lo taka hmang a, thu dik lo hmanga rampawn lama a thawnchhuah dante pawh an lo chhui tawh bawk. He loan hi kum 2009 khan IDBI Bank hian Kingfisher Airlines tan hian a pe a ni.