SC-in sorkarin a ennawn hma chu Sedition Law hmang lo turin ti

Sawisel leh buaipui hlawh tak, sorkar pawisawi leh sorkar laka hel tura midangte fuiha puh theihna, Sedition Law chungchang chu sorkar laipuiin a ennawn hma chuan hman rih loh, chawlh tir rih a ni dawn tih Supreme Court chuan a sawi.

Court chuan he dan hi sorkarin a ennawn hma chuan Sedition Law hnuaiah FIR ziahluh theih a ni dawn lo a, he dan huaia case la awmte pawh tihkhawtlai rih a ni dawn tih a sawi.

Chief Justice of India Justice NV Ramana chuan, "He dan hi uluk taka enfiah leh a nih hmaa lo hman chu a remchang lo a ni. Hei vang hian enfiah zawh fel a nih hma chuan sorkar laipui leh state-te pawhin Indian Penal Code-a sectoin 124 A (sedition law) hnuaiah FIR engmah an ziah luh loh kan beisei a ni," a ti. Enfiah a nih hmaa thubuai ziahluh thar a awm a nih chuan, thubuai siamsakte chu court-ah zualkoin, an laka thubuai thehluh chu titawp turin an ngen thei ang, a ti.

Thawhṭanni khan sorkar laipui chuan British awpna hnuaia awm lai an siam tawh, British lamin Mahatma Gandhi leh Lokmanya Bal Gangadhar Tilak-te thubuai siamsakna atana an lo hman, sedition law hi ennawn a ni dawn tih a lo sawi tawh a ni. He dan hnuaiah hian sorkar dodal zawnga chea puhte chu warrant awm kher lo pawhin man theih an ni.

Sorkar laipui chuan sedition law chu ennawn ṭha dawn mah se, hemi chhunga Supreme Court-in hman loh tura a ti chu a sawisel thung. He dan hi hman theih loha dah mai loin, police superintendent leh a chunglam level chinte chuan sedition law hnuaiah thubuai hi ziahluh chi a nih leh nih loh enpui ṭhin zawk se tiin a rawt a ni. Hei bakah he dan hnuaia court-a thubuai tangkhang mek eng maw zat awm pawh khawih theih loha dah ngawt chu ṭha a ti lo tih a sawi a, a buaipuitu court lam duhthlanaah dah zawk turin a ti bawk.

National Crime Records Bureau-in a talran danin, India ramah kum 2015-2020 inkar khan sedition case 356 ziahluh a ni a, he dan hnuaiah hian mi 548 man an ni bawk. Kum ruk chhung hian man zinga mi 12-te chauh chu sedition law hnuaiah hian thiam loh chantir an ni.