Delhi sorkarin Flyover Project 2 a pawm

Delhi sorkar chuan khawpui chhunga Flyover pahnih siamna tur, Rs vbc 724. 36 project a pawm.

Flyover hi Delhi khawchhak lam leh khawthlang lamah siam thar a ni dawn a, kum khat leh a chanvea zawhfel tur a nih thu official chuan a tarlang.

Deputy chief minister Manish Sisodia hoa Thawhlehnia expenditure finance committee (EFC) meeting-ah project pahnih hi pawm a ni. Sisodia chuan meeting zawhah project pawm a nih thu hi sawiin, Anand Vihar - Apsara Border inkarah Rs vbc 772.04 sengin flyover thar siam a ni dawn a, Punjabi Bagh- Raja Garden flyover chu Rs vbc 352.32 senga zauh a ni dawn bawk tih a sawi. Heng project hi khawpui chhung traffic tawt lutuk tihziawmna tur a nih thu leh, mipui veivakte tan pawh a ṭangkai dawn hle tih a sawi.

Sisodia chuan, "Heng projct-te hian khawpui traffic tawt vanga harsatna thleng a tiziaawm thei dawn a ni. Chief minister Arvind Kejriwal-a kaihhruai sorkar chuan Delhi khawpuia kawng tawt lutuk tihziawmna turin theihtawp a chhuah a, khawpui chhung cheimawi leh mipuite tana hmun nuam zawk siam chu a tum ber a ni," a ti.

Delhi sorkar hian Ambedkar University-a campus pahnih siam tharna turin Rs vbc 2,306.58 a pawm bawk. Deputy Chief Minister Sisodia chuan tuna university-in zirlal a lak theih zat chu 4,000 chuang a ni a, mahse Dheerpur leh Rohini-a campus thar pahnih siam a nih hunah chuan zirlai 30,000 vel an la thei tawh dawn niin a sawi.

Rohini-a Ambedkar University campus hi Rs vbc 1107.56 senga siam a ni dawn a, campus zau zawng hi sq meter 1,64,130 tur a ni a, zirlai 10,000 chuang an leng dawn a ni. Dheerpur campus hi sq meter 2,00,759-a zauah siamin, Rs vbc 1199.02 ruahman a ni a, zirlai 16,000 chuang an awm thei dawn bawk a ni.