US President-in Modi-a zin turin a sawm

US President Donald Trump chuan Prime Minister Narendra Modi-a chu kumin kumtawp lamah US-a zin turin a sawm.

Hruaitu pahnihte hi telephone-a inbiain, thawhdunna nghet zawk siam an duh thute sawiin, economy leh defence lama thawhdunna zau zawk siam te an sawidun a ni. South Asia leh Central Asia security chungchangte an sawidun bawk a, firfiakte pawikhawihna thleng ṭhin do let tura an thawhdun zel tur thu an sawi. White House chuan President Trump hian India chu a ram ṭhianṭha leh thawhpui ram pawimawh takah a ngaih thu a sawi.

Nikum November thlaa US President atana Donald Trump thlan tlin a nih khan Modi chuan lawmpuina thu a lo thawn tawh a ni. President thlannaah khan Trump hian Indian-American lakah pawh vote a zawng nasa a, India nena inlaichinna chungchang pawh a sawi ṭha hle a ni. PM Modi-a’n sorkar kalphung siamṭha a, economy ṭhanna tura a hmalakna te chu a fak a ni.

Modi chuan US President nena an inbiak thu hi nimin khan a twitter-ah tarlangin, President Trump chu India rama zin turin a sawm tih a sawi bawk. President Pranab Mukherjee pawhin US President hi lawmpuina a hlan ṭumin India rama zin turin a lo sawm tawh bawk. Trump hian politics lam a luhchilh hmain, sumdawnna lam thilah India ram hi ṭum eng emaw zat a lo tlawh tawh a ni.