CM panel-in Rs 50,000 chunglamah chhiah chawitir phut

Andhra Pradesh Chief Minister Chandrababu Naidu-a kaih­hruai chief ministers panel chuan sorkar laipui hnenah, Rs 50,000 chunglama sum inthawnnaah chhiah chawi tir turin an phut a, hemi rual hian credit cash transaction-a bank-in sum a chawi tir ṭhin titawp tur te, digital payment-a consumer-te chhiah chawi tir tawh pekir leh tur te, cashless payment chawi larna turin smart phone-te tan Rs 1,000 chin ngaihnathiamna siamsak turin an phut.

CM panel hian ‘Digital Paymennts’ chawilarna tura interim report a siam chu nimin khan Prime Minister Narendra Modi-a hnenah an thehlut a, he hunah hian Naidu bakah Madhya Pradesh CM Shivraj Singh Chouhan, Maharashtra CM Devendra Fadnavis leh Sikkim CM Pawan Kumar Chamling-te an tel.

Report thehluh hnu hian Naidu chuan press conference koin, report-a an tarlan tlangpuite a sawilang.

Report-ah hian Aadhhar card hman ṭangkai rawtna siamin, UID number chu know your customer (KYC) norms-ah nihna finfiahna pui ber atana hman a rawt a, Aadhhar law hman mek chu hemi atan hian a hman theih nghal niin an sawi. Bank leh a kaihhnawih thil dang bakah, post office-a payment siam zawng zawng chu Aaddhaar system nen inthlunzawm tir vek an duh thu an sawi.

CM panel hi sorkar laipuiin Rs 500 leh Rs 1,000 note a tihthih hnu, nikum November 30 khan din a ni. High-power panel hi mipuiten uar zawka digital payment an kalpui theihna tura rawtnan hrang hrangte siam tura ngen a ni.