Akali Dal-in hna thar nuai 20 siam a tiam

Punjab Assembly inthlan neih turah rorellai Shiromani Akali Dal chuan manifesto a tichhuak a, sorkarna an siam leh a nih chuan hna thar nuai 20 siam a tiam a, loneitute tan tubewell connection a thlawna pek a tiam bawk.

Akali Dal president leh Punjab deputy chief minister Sukhbir Singh Badal chuan an party thiltum hrang hrangte sawiin, thingtlang khaw 12,000 te chu bawlhhlawh paihna mumal tak, tui supply leh kawngpui ṭha pek vek an nih tur thu a sawi a, solar light an pe dawn tih a sawi bawk. Khawpui lamah pawh power sector chu an ngaih pawimawh tur a ni tih sawiin, electric hrui rukbo leh khawl lam fello thleng fo ṭhin tihrehna atan a hruite chu leiah phum vek an tum dawn tih a sawi. Khaw hrang hrang himna turin an thuam ṭha dawn a, CCTV te an dah tur thu a sawi bawk. Akali Dal leh BJP thawkdun hian kum 2007 aṭang khan Punjab-ah ṭangrual sorkar an siam tawh a, member 117 awmna assembly hi Ferbuar 4-an an inthlang dawn a ni. Seat 117-ah hian candidate 1,146 an awm.