SC-ah Jallikattu hman phalna khing let
Tamil Nadu state assembly chuan Thawhlehni khan Prevention of Cruelty to Animals (Tamil Nadu Amendment) Act, 2017 a pass a, he bill thar hnuaiah hian state chhungah Jallikattu sports neih phalsak a ni.
Bill hi member-te’n rei vak lo an sawiho hnuah, voice vote hmangin lungrual takin an pass a, President pawmpuina la turin thawn a ni ang.
Hetih lai hian Tamil Nadu sorkarin bawng chaiha infiamna, Jallikattu sports neih phalna dan a siam chungchangah Animal Welfare Board of India leh animal rights organisation dangte chuan nimin khan Supreme Court-ah petition an thehlut. Court chuan petition thehluh hi January 30-ah a ngaih tuah dawn niin Justice Dipak Misra kaihhruai bench chuan a tarlang.
Petition thehluhah hian kum 2014 khan Supreme Court ngeiin Jallikattu chu ransa chunga nunrawnna lantirna tiin a lo khap tawh a, hei vang hian Tamil Nadu state-in dan a siamṭhat chu lo dansak turin an phut. State sorkar chuan central law chu an duh angin an siamṭha thei ngawt lo niin an sawi.