Ram pumah Republic Day lawm

India Republic Day vawi 68-na chu nimin khan ram pumah lawm a ni a, a lawmna pui ber New Delhi-ah chuan Rajpath-ah parade ropui tak entir a ni.

Kum 1950, January 26 khan Constitution of India hman ṭan a ni a, President hmasa ber Dr Rajendra Prasad chuan rinawmna thu a tiam a ni. Hemi ni hi Republic Day atan hman zui a ni ta a ni.

New Delhi-a Republic Day lawmnaah hian Abu Dhabi Crown Prince, Mohammed bin Zayed Al Nahyan chu khuallian a ni a, President Pranab Mukherjee chuan hnam puanzar a pawtpharh. Rajpath leh Red Fort inkarah Republic Day Parade neih zui a ni a, President-in parade-te chibai hi a lo chhanglet a ni.

Parade-ah hian sipai thuam thil hrang hrangte pholan a nih bakah, state hrang hrang culture lantirin, state 29 zinga 17 in tableau an buatsaih a, central ministry leh department paruk-in an buatsaih bawk. Republic Day lawmna inkhawm hi darkar khat leh a chanve hman a ni.

Kumin Republic Day Parade-ah hian a ṭum khatna atan National Security Guard (NSG), Black Cat Commando tia sawite chu an tel a, commando 60 awmna contingent an inlan a ni. NSG anti-hijacking van, ‘Sherpa’ pawh a ṭum khatna atan parade-ah hian pho lan a ni a, he motor hi bulletproof niin, tuihnuai leh hmung chhengchhe takah pawh khalh theih a ni. Member 149 awmna, UAE military contingent pawh parade-ah an tel a, Republic Day parade-a foreign military cotingent an tel ṭum hnihna a ni. Parade neihna hmunah hian LCA Tejas Aircraft pathum-te meter 300-a sangah thlawkin thiam thil an lantir. Indian Army-te ralthuam hrang hrang, T-90 Bhushma tank, Infrantry Combat Vehicle BMP-2K, BrahMos Missile System Mobile Autonomous Launcher, Weapon Locating Radar Swathi leh Akash Weapons System leh Dhanush Gun System pawh pholan zingah a tel. Jabalpur-a Gun Carriage Factory siam, 155mm Dhanush artillery gun hi pakhat cheng vaibelchhe 14.50 man a ni.

National Bravery Award dawngtu, naupang huaisen mi 25 zinga 21 pawh parade hi zawhpui an ni a, huaisen lawmman dawngtu mi pali erawh an thi tawh a ni.