Vur tawlhin sipai 10 chhilh hlum

Jammu and Kahmir-a Gurez Sector-ah vur tawlhin sipai 10 a chhilh hlum.

Nilaini tlai khan Line of Control bul Bandipora district, Gurez sector-a army camp chu vur tawlhin a chhilh a, sipai eng emaw zat a chhilh tel a ni. Chhanchhuah hna thawh nghal niin, vurin a chhilh zinga sipai pasarih chu him taka lakchhuah an ni a, an zingah hian Junior Commisioned Officer pawh a tel. Sipai pathum ruang hmuh a ni bawk.

Official chuan Nilaini tlai vek khan Gurez sector-ah hian an patrol party, an post lam pana haw chu vur tawlh hian a chhilh bawk niin a sawi. Rescue team chuan vurin a chhilhna hmun aṭangin ruang pathum an hmu tawh a, chin hriat lohin mi dang eng emaw zat an la awm niin a sawi.

Kashmir Valley-a vur sur nasa vangin nimin khana ni thumna atan Srinagar-Jammu National Highway khar chhunzawm leh a ni. Srinagar International Airport-ah pawh nimin khan flight zawng zawng cancel vek a ni bawk.

Ni thum chhung kawngpui khar a nih avang hian Kashmir Valley-ah chuan nitin khawsakna atana mamawh thil a to chak hle a, thlai leh buhfai mante a sang chak hle. Mahse official-te chuan mipui mamawh thilte chu stock a tam tawk niin an sawi a, dawrkaiten an thil zawrh man an tisang tur vengin bazar hmun hrang hrangte endik a ni.