Feb thla tawp lamah sum khuahkhirhna tihtawp ring

Sorkar laipuiin Rs 500 leh Rs 1,000 note a tih thih hnua Reserve Bank of India-in sum lakchhuah tura bithliah chin a siam chu, February thla tawp lamah a tihtawp rin a nih thu banker-te’n an sawi.

RBI hian tunhnaiah ATM aṭanga sum lak theih zat chu card pakhat hmangin ni khatah Rs 10,000-ah a lo tisang tawh a, mahse kar khat chhung atanga sum lak­chhuah theih china a bithliah, saving account aṭanga Rs 24,000 leh, current acount aṭanga cheng nuai khat china a bithliah erawh a la ti danglam lo.

SBI research report, Ecorwrap chuan thla hnih chhung hian pawisa note tih thih avanga harsatna awmte pawh ziaawmin, thil awmdan pawh a pangngai chhoh theih beisei a ni tih a sawi. Bank official-te chuan financial year zawh hma ngeiin, RBI-in sum chetvel dan chungchangah khuahkhirhna a siamte chu a tihtawp vek an rin thu an sawi.

RBI hian pawisa note hlui thleng theih hun, December 30 thleng hawn a nih chhung khan mi tam takin an thleng fel hman loh avangin zawhna leh ngenna an tam tak an dawng a, hei vang hian pawisa hlui thleng theih hun hi a hawnsak leh mai thei niin, Hindustan Times chuan a tarlang. Mahse hun pek belh a nih pawhin sum thleng theih zat bithliah hi tihniamin, hun pawh a pe rei dawn lo niin a sawi.

Pawisa note hlui hi bank leh post office-ah kum 2016, December 30 thleng khan thleng theih a ni. Reserve Bank branch-ah chuan March 31 thleng an thleng phalsak a ni. Mahse Reserve Bank-a note hlui thleng turte hian, December 30 hmaa bank-a an thlen hman lohna chhan ṭha tak an neih tel a ngai dawn a ni.