Covid precaution dose norms thlahdul

Sorkar laipui chuan Covid-19 vaccine precaution dose lak dan turah, ram pawna zin chhuak turte tan bik dan a thlahdul.

Kaihhruaina siamah chuan precaution dose la tur hian kum 18 chin, Covid-19 vaccine dose hnihna an lak aṭanga thla kua a tlin a ngai a ni. Mahse hriattirna siamtharah, ram pawn lama zin chhuak turte chuan thla kua a tlin hma pawhin precaution dose hi an la thei dawn a ni.

Union health minister Mansukh Mandaviya chuan hemi chungchang hi a twitter-ah tarlangin, India mi leh zirlai, ram pawna zin turte chuan an kalna ram turten an lo phut a nih chuan precaution dose hi an la thei dawn tih a sawi a, CoWIN portal-ah pawh kaihhruaina an siam danglam hi dahlan a ni thuai dawn tih a sawi bawk.

Ram chhunga Covid vaccine pek chhuah buaipui tura sorkarin panel a din, National Technical Advisory Group on Immunisation (NTAGI) rawtna siam anga inkaihhruaina hi thlahdul ṭhen a ni tih sorkar chuan a sawi a ni.

Kumin January 10 aṭang khan healthcare leh frontline worker bakah kum 60 chin, natna benvawn neite hnenah precaution dose hi pekṭan a ni a, March thla khan kum 60 chinte tan lak theih a ni leh a ni. April 10 aṭang khan kum 18 chin, precaution dose la thei chin tan an duh chuan private vaccination centre-ah man chawiin an lak phalsak a ni bawk.