India ramah Covid-19 kai 4,25,282 awm tawh

India ramah Covid-19 hripui kai mi 4,25,282 an awm tawh a, Ministry of Health and Family Welfare-in nimina report a tihchhuahah hri kai hmuh chhuah thar 14,821 an awm. 

Enkawl dam 2,37,196 awmin darkar 24 chhungin mi 9,440 lai an enkawl dam a, enkawl dam rate chu 55.77% niin hri kai mek 1,74,387 an awm thung. Nimin report-ah chuan mi 445-in an thihpui leh a, hri len ṭantirh aṭang khan mi 13,699-in an thihpui tawh a ni.

Indian Council of Medical Research (ICMR) chuan ni khatah Covid-19 sample 1,43,267 an enfiah tih an tarlang a, ram pumah sample 69,50,493 lai an endik tawh bawk. 

ICMR hian Covid-19 sample test-na tur laboratory pawmpui hi ram pumah 985 a nei a, sorkar laboratory 723 leh private laboratory 262 a pawmpui tawh.

Hrileng hluarna ber Maharashra-ah chuan mi 1,32,075-in an kai tawh a, kai thar 3,870 awmin 65,744 chu enkawl dam an ni tawh thung a, mi 60,161-in an la kai mek a ni. Nimin thleng khan Maha-ah hian mi 6,170 an thi tawh a, darkar 24 chungin mi 186 an thi leh a ni.

Hripui leng kai tam lamah Delhi chuan Tamil Nadu a khum ta a, Delhi-ah chuan mi     59,746-in an kai tawh laiin Tamil Nadu-ah chuan mi 59,377-in an kai tawh thung. 

Delhi-ah hian hri kai hmuh chhuah thar 3,000 lai an awm leh a hri kai mek 24,558 awmin enkawl dam 33,013 an awm tawh. Tamil Nadu-ah hian hri kai hmuh chhuah thar 2,532 an awm a, hri kai mek  25,866 awmin mi 32,754 chu an enkawl dam tawh a ni.

Delhi-ah hian mi 2,175 laiin an thihpui tawh a, Maharashtra tih lohah chuan thihpui an tam ber tawh bawk.