J&K-ah India sipai that

Jammu & Kashmir khawthlang lama India leh Pakistan inrina, Line of Control (LoC) hnaiha Rajouri district-ah Pakistan sipaiten India sipai pakhat an that a, tun thla chhunga LoC-a India sipai pali an thihna a ni ta.

He thil thleng hun hi nimin zing lam kha niin, zing dar 3:30 leh 5:50 ah silai leh bomb hmangin Pakistan sipaite hian LoC hnaiha Poonch district-a Krishna Ghati khua leh Rajouri-a Nowshera sector hmunte chu an kap niin thuneitute chuan an sawi.

Rajouri-a Nowshera sector hmuna post duty sipai pakhat chu Pakistan sipaite hian an kap hliam a, a hliam hi tuar loin a hnuah a thihpui a ni. Rajouri-ah hian June 4 leh 10 khan India sipai thah an lo ni tawh a, June 14 khan Poonch-ah pakhat thah a lo ni tawh bawk.

LoC hnaiha Poonch leh Rajouri district-te hi inkaihhai puanna hmun a ni a, mahse Pakistan hian kumin chhungin inkaihai hi vawi 2,000 chuang a bawhchhe tawh a ni.