Delhi-ah Serological Survey neih tum

Union Ministry of Home Affairs (MHA) chuan Delhi-a Covid-19 hri darh zel tur venna atan Serological Survey neih tum a nih thu a tarlang a, June 27 aṭanga July 10 chhungin mi 20,000-te chu Covid-19 an kai nge kai loh tih test tum a nih thu a tarlang bawk. 

Pathianni khan union home minister Amit Shah hoa meeting neih a ni a, he meeting-ah hian Delhi chief minister Arvind Kejriwal, health minister Dr Harsh Vardhan, LG Anil Baijal leh senior official dangte pawh an tel a ni. Meeting-ah hian Dr Paul Committee Report-a 'Containment Strategy on COVID-19 in Delhi' tih chu ngaihtuah ho a ni a, Delhi-a Covid-19 do dan tur kawng hrang hrangte sawiho a ni. 

Dr Paul Committee Report-ah hian Delhi-a containment zone hrang hranga hma lak dan tur leh hma lak tawh dan te, Arogya Setu App hman chungchang te, NGO tena COVID Care Center uluk taka an kalpui chung changte leh home isolation kalpui dan leh hmalak zel dan turte chu meeting-ah hian sawi ho a ni.

Nimin aṭang khan Delhi-a district awm zawng zawng 11 chu damdawi-in lian nen a thlunzawm vek tur an nih thu Dr Paul's report-ah hian a sawi lan a ni. Vawiin aṭangin district tinah district level team siam tur a ni a, heng mite hian June 26 aṭangin Delhi-a zone hrang hranga khuahkhirhna kalpui dan an ennawn dawn a,  June 30 aṭangin con­tainment zone bika hma­lakna leh hmalak dan tur an zir chiang bawk ang. 

Delhi sorkar chuan hri vanga thite hi a chhui chiang zel dawn a, an thih hmain engtik aṭang khan nge hri a kai ṭan tih leh hri a kai aṭanga ni engzatah nge an thih tih chu a zirchiang ang. Heng hmalakna te hi Covid-19 dona kawnga hmalak zel dan tur hriatthiamna tura tih a ni.