Akhilesh-a’n inthlan hnua budget pharh turin ngen

Uttar Pradesh Chief Minister Akhilesh Yadav-a chuan nimin khan Prime Minister Narendra Modi-a hnenah lehkha thawnin, union budget chu state assembly election zawh hnuah pharh turin a ngen.

Akhilesh Yadav-a chuan state assembly inthlan hmaa budget hi pharh a nih chuan, UP chuan an state hmasawnna tur scheme tam tak a chan phah thei a ni, a ti.

BJP kaihhruai NDA sorkar chuan kumina Parliament budget session neih hun tur chu thla khata sawn hmain, February 1 hian union budget pharh a tum a ni. February 4 aṭangin state panga-ah assembly inthlan neih a nih dawn avangin eptu hrang hrangte chuan budget pharh tum hun hi an sawisel a, sorkar laipui chuan he hun hi vote zawnna remchangah a hmang thei a ni tiin sawn hla turin Supreme Court-ah pawh an lo ngen tawh a ni. Mahse Supreme Court chuan Thawhṭanni khan eptute ngenna hi hnawlin, hei hi court lam inrawlhna tur a ni lo tih a sawi.

Supreme Court-in budget pharh hun hi ruahman lawk anga kalpui tura a tih hnuah, Election Commission chuan hriattirna tichhuakin, sorkar laipui chu budget a pharh hunah assembly inthlan neihna tur state panga tana scheme leh hmachhawp a neihte puang lo tur te, heng state-a a hnathawh tawh leh, hlawhtlinna hrang hrang a neihte pawh tarlang lo turin a ti a ni.

Election Commission-in budget pharh turah khuahkhirhna a siam tak avangin UP CM Yadav chuan PM hi lehkha a thawn a, an state tana sorkar hmachhawp te puan theih a nih tak loh avangin budget pharh hun hi sawn hla mai turin a ngen.

Uttar Pradesh-a hian February 4 aṭangin inthlan hi neih ṭan a ni dawn a, thawh sariha neih a ni ang. CM Akhilesh Yadav chuan inthlanah hian a chuh dawn lo tih a sawi a, kum 2018 thleng atan MLC a nih avangin tun ṭum inthlanah hian a ding dawn lo a, an party candidate-te tan theihtawpin a campaign dawn tih a sawi. UP-ah hian rorellai, Samajwadi party leh Congress party an thawkdun dawn a, seat pawh an insem fel tawh a ni.