Karnataka-ah Kambala sport neih phalsak phut

Tamil Nadu sorkarin Jallikattu sport khapsak an nih hnua hman leh theihna dan a siam hnuah, Karnataka-a zirlai pawlte chuan an state infiamna pawimawh Kambala neih a nih ve leh theih nan lungawilohna lantirin an pungkhawm.

Kambala hi lawi hmanga intlansiakna sport chi khat a ni. Zirlai lungawilote hi Hubli-ah an pungkhawm a, Kambala khapna chu hlih an phut a ni. Mangaluru-ah pawh Kambala sport khapna duhlohna lantirin zirlai ṭhahnem tak an pungkhawm bawk. Karnataka Chief Minister Siddarmaiah chuan an traditional sport khapsak an ni chungchangah, a ṭul a nih chuan khapna hlip tura ordinance siam a nih tur thu a lo sawi tawh a ni. Siddaramaiah chuan, Kambala chu state sorkarin a dodal loh thu sawiin, court thuneihna a ni a, mahse a ṭul a nih chuan ordinance siam a ni ang, a ti.

Karnataka chief minister hlui leh Bharatiya Janata Party hruaitu ni bawk BS Yeddyurappa chuan, Kambala khapsak an ni chu a hriatthiam loh thu leh, hman chhunzawm a nih theih nana hmalak a nih tur thu a sawi bawk. Tamil Nadu sorkarin Jallikattu khapsak an nihna khinglet a, hman phalna dan a siam hnuah, Karnataka state chuan Kambala hman a nih ve leh theih nan an nawr mek a ni. Kambala committee chuan an thilphut nawr nan Tamil Nadu leh Dakshina Kannada district-ah te nawrh huaihawt an tum thu an sawi.

People for the Ethical Treatment of Animals (PETA)-te ngenna avangin, Karnataka High Court chuan November 2016 khan Kambala sport neih khapna hi a lo tichhuak tawh a ni.