NIA-in rel chetsual dan a chhui
National Investigation Agency (NIA) chuan Ningani aṭang khan Uttar Pradesh, Andhra Pradesh leh Bihar-a rel chetsualna thleng chungchang a chhui ṭan.
Uttar Pradesh-a Kanpur, Andhra Pradesh-a Kuneru leh Bihar-a Ghorasahan-a rel chetsualna thlengah hian, rel kawng bulah bomb chak tak hmuh a ni. Hei vang hian heng rel chetsualna thlen chhan dik tak hi chhui turin NIA kutah hlan a ni.
Bihar Police-te chuan Ghorasahan-a rel chetsualna thleng kaihhnawihah mi pathum an man a, heng mi pathumte hian Pakistan Inter Service Intelligence (ISI) nena inzawmna nei, Nepal mi pakhat Brajesh Giri hnen aṭangin nikum October 1 khan rel kawngah bomb kam tura hrilhin, cheng nuai thum an dawng niin an sawi. An pawisa dawn hi Dubai-a ISI agent Shamshul Huda chuan kaltlanga pek an nih thu an sawi bawk.