UP-ah Akhilesh leh Rahul-te’n joint campaign nei

Uttar Pradesh-a assembly inthlan neih tura thawk dun tur, Samajwadi Party leh Congress Party chuan nimin khan Lucknow-ah joint campaign an ṭan. SP hotu leh Chief Minister Akhilesh Yadav leh Congress vice president Rahul Gandhi-te chuan joint conference neiin, hemi hnu hian road show neih zui nghal a ni.

Assembly seat 403 awmnaa inthlan neih turah hian SP chuan seat 298-ah chuhin, Congress Party-in seat 105 a chang dawn a ni. Februa­ry 4 aṭangin vote thlak ṭan a ni ang a, inthlan hi thawh sariha neih a ni dawn a, March 8-ah a thawh hnu­hnung ber neih a ni ang.

Rahul Gandhi chuan UP-a Congress leh SP thawkdun chu state tana hmasawnna, remna leh muanna leh hmuingilna thlentu tur a ni tih a sawi a, RSS-BJP-te’n inlavung a, mipuite thu dik lo an tiam ṭhin chu tihtawp an tum tih a sawi. UP ṭhalaite tan kawng thar hawn sak an duh a, an thuthlung zawmtute chuan an campaign chu an zawm ve theih reng thu a sawi bawk. SP-Congress thawkdun chuan UP-ah sorkar thar an siam ngei dawn tih sawiin, Congress hruaitu chuan an thawhdunna chu Hindu, Muslim, Sikh, Kristiante inpumkhatna entirtu a ni, a ti.

Akhilesh Yadav pawhin party pahnih thawkdun chuan hnehna an chang ngei dawn tih sawiin, hmasawnna hna pawh chak zawka an thawh theih tur thu a sawi. BJP kaihhruai sorkar laipui chuan mipuite harsatna nasa tak a siam­sak tawh a, in thlanah hian mipuite chuan an vote hmangin an chhang let dawn a ni, tiin a sawi.