PM Modi-a’n martar-te zahna hlan
Prime Minister Narendra Modi chuan nimin khan thla tina radia programme a hman ṭhin, Maan Ki Baat vawi 28-naah ram tana nunna hlantu martar-te zahna a hlan.
PM chuan India-in zalenna a hmuh theihna atana an nunna hlantute leh ram himna tura an nunna chan sipaite chu a hriatreng thu a sawi a, heng mite hriatrengna hun hmang tur hian mipuite a ngen. Modi chuan Republic Day-a sipai huaisen chawimawina hlante chanchin chu social media lamah te a theih anga tam thehdarh turin ṭhalaite a ngen bawk a, hei hi ram mipui leh
ṭhalaite cho phurtu a nih bakah sipai ṭang mekte pawh phurna nasa tak a pe dawn a ni, a ti.
March 9 aṭanga Class X leh XII Board exam hmachhawn tur zirlaite a fuih bawk. PM chuan zirlaite chu an taksa tihhahdam dan turte kawhhmuhin, exercise lak ṭhat chuan an rilru sawrbingna lam thlengin a pui thei tih a sawi. Nu leh pate pawh zirna kawngah an fate nawr nasa lutuk lo turin a ngen a, fail te, mark hmuhchhiatte pawh zirna in a ken tel vek a ni a, zirlaite chu an duhthlan dan anga zir tir tur leh, lehkha zirna atana boruak ṭha siamsak turin a ngen.