Candidate-te sum lakchhuah theih tipung tura ngenna hnawl
Election Commission of India chuan Reserve Bank of India hnenah ziaka ngenna thlenin, assembly inthlan neihna tur state panga-a candidate-te tana sum lakchhuah theih zat tihpung turin a ngensak. Mahse RBI chuan ngenna hi a hnawlsak.
Nikum November 8-a sorkar laipuiin Rs 500 leh Rs 1,000 note a tih thih hnu khan pawisa lak chhuah theih zatah hian khuahkhirhna siam zui nghal a ni. January thla tir lam khan ATM aṭanga card pakhat aṭanga vawikhata sum lakchhuah theih zat chu Rs 10,000-ah tihsan a ni a, mahse kar khat chhunga saving account aṭanga sum lak theih zat, Rs 24,000 chu tihdanglam a la ni lo.
Kar kalta Nilaini khan EC chuan RBI hnena hian ngenna thehlutin, candidate-te tan bik kar khat chhunga sum lak chhuah theih zat chu cheng nuai hnihah tihpun sak turin a ngen a ni. Commission chuan constituency returning officer-te chuan candidate-te tan inthlan neih tur pualin, bank account an siam aṭanga sum an lakchhuah theihna tur hian certificate pawh an siamsak dawn niin a sawi.
Inthlan neihna tur state pathum, Uttar Pradesh, Uttarakhand leh Punjab-ah chuan candidate-te hi cheng nuai 28 chin an hman phalsak a ni a, Goa leh Manipur-ah chuan cheng nuai 20 chin phalsak an ni thung.