Uttarakhand-ah candidate 722 chuang awm

Uttarkhand-a seat 70 awmna, Legislative Assembly inthlan neih turah candidate 722 an awm. Inthlan hi thawh khata neih a ni ang a, February 15-ah mipuiten vote an thlak ang.

Party lian, Congress leh BJP chuan seat awm zawng zawngah candidate an siam vek a, Chief Minister ni lai, Congress hruaitu Harish Rawat-a chuan bial hnihah a chuh dawn a ni.

Dehradun district-a Dharampur Assembly constituency-ah candidate an tam ber a, he bialah hian mi 24-in an chuh dawn a, an zingah hian Congress candidate atan state Forest Minister Dinesh Aggarwal te, BJP candidate De­hradun Mayor Vinod Chamoli te an tel. CM hian Haridwar (rural) leh Udhamsingh Nagar district-a Kichcha Assembly seat-ah a chuh dawn a, heng bial hnihah hian candidate pariat ve ve an awm.

Goa-ah mi 250-in inthlan chuh dawn :
February 4-a assembly inthlan neihna tur, Goa-ah chuan seat 40-ah candidate 250 an awm. Nomination paper thehluhte enfiah a nih hnuah mi 250 te lehkha thehluh chu pawm a ni. Candidate 250 zinga 131 hi South Goa biala ding tur niin, North Goa bialah mi 119 an ding dawn a ni.

BJP chuan bial 36-ah candidate siamin, bial hnihah indepen­dent candidate-te a thlawp dawn. Congress party chuan bial 37-ah a chuh dawn a, NCP-in bial 16 le, MGP-GSM-Shiv Sena ṭangrual pawlten candidate 26 an siam bawk. Aam Aadmi Party (AAP) chu party mala chuh hnem ber niin, bial 39-ah candidate a nei.

Goa-ah hian vote nei mi nuai 11.08 an awm a, vote thlakna tur polling station 1,649 siam a ni ang. Vote thlakna atan hian EVM bakah Voter-Verified Paper Audit Trail (VVPAT) hman a ni dawn a ni.