Kashmir : Nawrh huaihawt leh police-te innawr buai ; J&K CM hlui Mehbooba Mufti house arrest-in hreng

Jammu and Kashmir-a Budgam district-a sorkar hnathawk pakhat kahhlum anih avangin nimin khan Kashmiri pandit-te chuan lungawi lohna an lantir a, mipui lungawi lo pungkhawmte hi police-te chuan hnawhdarh nan tear gas an hmang. Jammu and Kashmir chief minister hlui, PDP hotu Mehbooba Mufti pawh pawn chhuak thei loin, house arrest-in hren a ni nghal bawk.

Ningani khan central Kashmir-a Budgam district-a Chadoora-a tehsil office-a thawk, Rahul Bhat chu Tehsildar office chhungah kahhlum a ni. He thil thleng avang hian Kashmir Valley-a PM job package hnuaia Kashmiri Pandit hnathawkte chuan nimin khan Sheikhpora-ah lungawi lohna an lantir a ni. Thuneitute laka an lungawi lohna thute leh, rorelna dik tak an duh thu te an aupui a ni.

Srinagar airport pana kawngzawh an tum chu police-te dangin an innawr buai zui ta a ni. Police-te chuan mipui hnawh darh nan tear gas te an hmang a ni.

Mipui lungawi loa pungkhawmte chuan, PM job package hnuaiah Kashmir Valley-a ṭhalaite chu hna thawh luih tir an ni a, mahse sorkar lam chuan venhimna ṭha a pe leh thei silo niin an sawi. Sorkar chuan an hmakhua a ngai tak tak a nih chuan, ṭhalaite chu central sorkar hnuaiah hna pe zawk turin an phut bawk. "Kashmir Valley dinhmun dik tak zirchiang hmasa loin, Kashmiri Pandit-te hruai kirin, an himna lam an ngaihtuah pui leh silo," an ti. Thuneitute hlawhchhamna avangin kum 1990 hunlai dinhmun angah an kir leh niin an sawi bawk.

Hetih lai hian Budgam-a Kashmiri Pandit-te tlawh tumtu, PDP hotu leh chief minister hlui Mehbooba Mufti chu pawn chhuak thei loin house arrest-a hren a ni. Mufti hian hren a nih thu a twitter-ah a tarlang a ni.