Covid hri kai thar 2,841 awm belh

India ramah Ningani khan Covid-19 hri kai thar 2,841 an awm belh leh a, hri vangin mi pakua an thi bawk.

Nimin zinga Ministry of Health-in data a tichhuahah, nimin zing dar 8 thleng khan ram pumah Covid hri kai mek 18,604 an awm. Hri kai hmuh chhuah tawh aṭangin hri kai mek hi 0.04% an ni a, hetih lai hian hri kai enkawl dam, recovery rate hi 98.74% a ni tawh a ni.

Daily positivity rate chu 0.58% niin, weekly positivity rate pawh 0.69% a ni bawk.

Ram pumah Covid-19 hri vanga thi hi nimin zing thleng khan mi 5,24,190 an awm tawh a, thihpui hi hri kai hmuh tawh aṭangin 1.22% an ni.

Covid vaccine pawh pek chhuah chhunzawm zel niin, does vaibelchhe 190.99 chuang pek a ni tawh.

Medical journal, The Lancet-in zirchianna a neihah, Covid-19 hri kai damdawi-ina enkawl ngai zinga a zahve zet chu, hri an kai aṭanga kum khat hnuah pawh an taksaah symptom pakhat tal an la nei niin a sawi. Lancet Respiratory Medicine chuan an zirchianna aṭang hian Covid-19 hri kai tawh zinga tam tak chu rei tak hnuah pawh multiple organs leh system-ah effect an la tuar a ni, a ti. "Covid-19 hri kai dam lehte hian kum hnih hnuah pawh mipui nawlpui nena khaikhinin an health status hi a la hniam zawk a ni," a ti. Covid symptom rei tak an neih zingah hian chau/zawi, tihrawl na, mut ṭhat loh, thawchham awlsam te a ni.