Kashmiri Pandit-te tear gas-a phuh chungchang chhui dawn
Jammu and Kashmir Lt Governor Manoj Sinha chuan May 13-a Kashmiri Pandit-ten lungawi lohna an lantir ṭuma pungkhawmte tear gas-a phuh an nih chungchang chu chhui chiang turin nimin khan thupek a tichhuak.
Pungkhawmte beih an nihnaa official inhnamhnawihte chungah action na taka lak a nih tur thu thuchhuah chuan a tarlang bawk.
Kashmiri Pandit-te hian firfiakte hian sorkar hnathawk pakhat, Rahul Bhat a office chhunga an thah avangin lungawi lohna hi an lantir a, boruak ṭha tak hnuaia lungawi lohna an lantir chu police-te tear gas in an phuh nia sawi a ni. Kashmir Pandit-te nawrh huaihawtna hmuna kal tum, J&K chief minister hlui Mehbooba Mufti pawh pawn chhuak thei loin, house arrest-a dah a ni zui bawk a ni.
Manoj Sinha chuan he thil thleng chhui tura din, Special Investigation Team (SIT) chuan Kashmiri Pandit-te beih an nih dan hi an chhui dawn tih a sawi. Security force-te pawh nawrh huaihawtte laka tharum hmang lo tura hriattir an ni tiin, Chadoora police station house officer (SHO) pawh sawn a ni nghal a ni. Sorkar chuan Rahul Bhat-a nupui thihsan chu hna pek a tiam bakah, a chhungte pawh suma ṭanpui a tiam bawk.
Sinha chuan Kashmiri Pandit-te pawh inbengdai tura ngenin, an harsatna neihte chu chinfel sak thuai an ni ang, a ti. "Politician leh political party hrang hrang pawh kan thawhho hun a ni tih hria a, boruak ṭha leh muanawm a awm theihna tura hma la turin ka ngen a ni. Mi ṭhenkhat boruak tihchhiat tuma che an awm a, mahse heng mite hian an thil tumah an hlawhtling dawn lo a ni," a ti.