Parliament Budget Session ṭan ; Vawiin-ah union budget pharh dawn
Parliament Budget Session chu nimin khan ṭan a ni a, President Pranab Mukherjee chuan joint session hmaah thu sawiin, sorkar laipui hnathawh tawh leh a hmalak tumna hrang hrangte a sawilang.
President Mukherjee chuan sorkar laipuiin healthcare lamah kawng hrang hranga hma a lak thu sawiin, immunisation programme hnuaia naupang nuai 55 zet ṭanpui an nih thute a sawichhuak.
Kuminah hian budget session hi sawn hma a ni a, a ṭum khatna atan February 1-ah union budget pharh a ni dawn a, kumin aṭangin railway budget hran awm loin, union budget-ah chhunfin a ni tawh dawn bawk.
Nimina joint session-a President thusawi tlangpui te -
- Budget pharh hun sawn hma leh, railway budget nena chhunfin a nih dawn avangin session chhinchhiah tlak tak a ni dawn a ni.
- Sorkar chuan mi rethei, hnam hnuaihnung leh hnuchhawn zawk te, loneitu, kuthnathawktu leh ṭhalaite hamṭhatna tur a ngai pawimawh hle a, retheihna umbo turin hma a la mek a ni.
- Social security scheme hrang hrang hnuaiah mi rethei vaibelchhe 13 te hnenah hamṭhatna pek an ni.
- Banking system awlsam zawka kalpuina turin Indian Postal Payment Bank ṭan a ni
- Pradhan Mantri Mudra Yojana hnuaiah mi vaibelchhe hnih chuangte loan pek an ni
- Antodaya Yogna hnuaiah dinhmun chhe zawk hmeichhiate chawikan tum a ni
- Housing scheme, clean water leh green energy scheme hmangin sorkar chuan mi rethei tam tak a ṭanpui
- Thianghlimna leh faina kalpuiin, hemi hnuaiah hian inthiarna vaibelchhe thum sakna tur sum pekchhuah a ni
- Deen Dayal Upadhayay Gram Jyoti Yojana hnuaiah thingtlang khaw 11,000 chuangah electric eng pek an ni a, LED bulb chu UJALA scheme hnuaia 11,000 sem a ni.
- Loneitute chawikanna turin kawng hrang hrangin hma lak a ni a, farmer card vaibelchhe thum chu debit card-ah lehsak an ni ang.
- Kum sawm chhunga ṭhalai vaibelchhe khat training pekna tur Pradhan Mantri Kaushal Vikas Yojana chu tlangzarh a ni a, hemi atan hian cheng vaibelchhe 12,000 ruahman a ni.
- Ṭhalai sumdawnna lam bul ṭan turte tan skill centre eng emaw zat hawn a ni.
- Agriculture leh non-sector danga minimum wage chu 42% a tihsan a ni.
- Tribal area-a district 300 zinga 100 chu cheiṭhat an ni ang.
- National gas pipeline project, km 2,500-a thuiah thawh a ni dawn a, hemi atan hian cheng vaibelchhe 12,5000 dah a ni. He project hian district 40 a huam dawn a, khawpui 20 chuanga industry-te nasa takin a pui thei dawn a ni.
- E-visa policy thar pawm a ni a, hei hian ram 160 a huam a ni. Tourism sector ṭhanna pawh 10% chuang a tling.