PM-in boruak ṭha tak siam turin party dangte ngen

Prime Minister Narendra Modi-a chuan nimina Parliament Budget session ṭan hmain, party dangte chu boruak ṭha tak hnuaiah session neih a nih theih nana pui turin a ngen.

PM chuan kuminah thla khat dawnin budget session neih hun sawn hma a ni a, hei hi financial year thar, April 1 aṭanga inṭan tura hman ṭan nghal a nih theih nana ti an nih thu leh, kum za dawn lo kalpui tawh Railway Budget a hrana pharh ṭhin chu a ṭum khatna atan annual budget nena chhunfin a nih thu a sawi.

February thla hian state panga-ah assemby inthlan neih a nih dawn avangin eptu party-te chuan budget pharh hun tur hi sawn turin Supreme Court-ah an ngen a, mahse court chuan an ngenna hi hnawlin ruahman lawk anga kalpui turin a ti. Mahse Election Commission chuan annual budget pharh hunah, sorkar laipui chu assembly inthlan neihna tur state-a an hnathawh hrang hrang leh, heng state puala scheme a siamte sawilang tel lo turin a ti thung.

Budget session hi thawh hniha neih a ni dawn a, a thawh khatna hi February 9 thleng neih niin an chawl lailawk ang a, March 9-ah chhunzawm lehin April 12 thleng neih a ni ang. Nimin khan Economic Survey report pek a ni a, vawiinah Finance Minister Ajrun Jaitley-a’n annual budget a pharh ang.