Union Minister hlui a thi

Union Minister hlui leh India Union Muslim League hruaitu, Kerala MP ni lai E Ahamed chu nimin zing khan a thi.

E Ahamed hi Thawhlehni-a Parliament joint session neih laiin a lung ṭha lo avangin a chau a, nikhaw hre loin a awm a ni. Ram Manohar Lohia Hospital-ah hruai nghal niin, life support system hmanga enkawl nghal ni mah se, nimin zing dar 2.15 khan a thi a ni. A ruang hi AIIMS hospital-ah lak a nih hnuin, nimin vek khan Kerala panpui nghal a ni.

Congress kaihhruai UPA sorkar-a khan Ahamed hi Minister of State for External Affairs a lo ni tawh a, kum 1991 aṭang khan Kerala-a Malpurram bial aṭangin Lok Sabha member a la ni ngar ngar a ni.

Parliament rorel inkhawm hi member ṭanglai thi an awm a nih chuan ni khat atan rorel tihtawp a ni ṭhin. Mahse nimin kha Budget pharh ni a nih avangin inkhawm tihtawp a ni lo a, vawiin hian Ahmed-a sunna atan inkhawm hi tihtawp a ni zawk dawn tih Lok Sabha Speaker Sumitra Mahajan chuan a sawi.