BJP 'bulldozer politics' vangin Delhi CM-in AAP MLA-te meeting neihpui

Delhi chief minister leh Aam Aadmi Party (AAP) convenor Arvind Kejriwal chuan nimin khan BJP 'bulldozer politics' chungchang avangin AAP MLA-te meeting a neihpui.

Meeting hi chief minister chenna inah neih a ni a, rorellai AAP MLA-te an tel ṭha hle.

Delhi-a BJP thuneihna, civic body pathumte chuan khawpui chhung hmun hrang hrangah dan loa awm nia sawite hnawhchhuah beihpui an thlak mek a, bulldozer hmangin structure siam tawhte an tihchhiatsak a ni. Demolition drive neihna zingah hian Shaheen Bagh, Madanpur Khadar, New Friends Colony, Mangolpuri, Karol Bagh, Khyala leh Lodhi Colony te a tel.

Municipal corporation-te hian Delhi BJP president Adesh Gupta-a'n khawpui chhungah Rohingya leh Bangladesh mi dan kalha cheng an awm thu mayor-te hnena complaint an thehluh hnuah, demolition drive hi kalpui a ni.

Kar liam ta Zirtawpni khan Delhi deputy chief minister Manish Sisodia chuan union home minister Amit Shah hnenah lehkha thawnin, dan loa awm tih chhuanlama thil tihchhiatte chu tihtawp tir turin a ngen. BJP 'bulldozer politics' chu na taka sawiselin, Sisodie chuan civic body-te chuan khawpui chhunga mi nuai 63 vel chenna chu tihchhiat sak an tum niin a sawi. Nimina meeting-ah hian CM Kejriwal chuan bulldozer hmanga in leh dawrte tihchhiat chhunzawm zel a nih chuan, India independent hnua thil tihchhiatna nasa ber a ni dawn tih a sawi a, BJP kaihhruai municipal corporation-ten demolition drive an neih hi dodal tura an party MLA-te chu fuihin, jail tang tur pawha inpeih turin a ti.

"Bulldozer hmangin colony-te panin, dawr leh in te an tichhia a, a chengte ngeiin dan ang thlapa an sak a ni tih lanna paper an lo hmuh pawhin an ensak duh lo a ni," tiin Kejriwal chuan a sawi. 'Delhi hi a tirah ruahmanna fel nana din a ni lo a, hetianga an kalpui chuan khawpui chhung 80% chu dan kalha awm tiin an puh thei dawn a, hengte hi an tichhe vek dawn em ni?", tiin a zawt.