Farooq Abdullah-a'n 'The Kashmir Files' khap a phut

Jammu and Kashmir chief minister hlui Farooq Abdullah chuan Vivek Agnihotri film siam, sawi hlawh tawh 'The Kashmir Files' chuan ram chhunga inhuatna boruak a siam nia sawiin chhuah khap a phut.

Farooq Abdullah chuan 'The Kashmir Files' film chu belhchian dawl lo, thil thleng chungchang a tarlan pawh thil dik lo vek a ni tih a sawi.

Pathianni khan People's Alliance for Gupkar Declaration hruaitute chuan tun hnaia Kashmir Valley-a pawikhawihna leh buaina thleng chungchangah Lt Governor Manoj Sinha an hmu a, an zingah hian Abdullah bakah PDP hotu Mehbooba Mufti te pawh an tel.

Lt Governor chuan People's Alliance for Gupkar Declaration hruaitute nena an inkawmnaah, Kashmir Valley-a Kashmir Pandit te chenna hmunah venhimna tihkhauh a nih tur thu a lo hrilh a ni.

Abdullah chuan dan leh thupek dinhmun a ṭha lo a, khualzinten Kashmir Valley an tlawh chhoh ṭan leh mek laiin, ni tin inthahna a thleng niin a sawi. "Inhuatna hi kan tihtawp tawh a ngai. 'The Kashmir Files' ah hian Muslim-in Hindu a that a, a mi thah thisen chuan buhfai silin, a nupui hnenah ei tura a tih laite a awm. He film hi belhchian dawl lo, ram chhunga inhuatna thlentu chauh, Valley-a ṭhalaite pawh mi ṭha lo tak anga lantirtu chauh a ni," a ti. Hetianga inhuatna thleng thei chi hi tihtawp a ṭul thu a sawi.

Singapore ram chuan 'The Kashmir Files' hi sakhaw hrang inkara inhuatna chawk chhuak thei nia sawiin, an rama chhuah a lo khap tawh a ni.