Tamil Nadu politics buainain zual lam a pan zel

Tamil Nadu chief minister nih inchuha O Panneerselvam leh VK Sasikala-i inkara buaina chuan zual lam a pan zel.

Chief minsiter atana VK Sasikala-i dah tum a nih chungchangah acting chief minister O Panneerselvam a lungawi lo a, Sasikala-i hmun kian turin CM aṭanga banna thehlut turin nawr luih a nih thu a sawi. Hemi hnu hian party hruaitu pahnihte hi ṭawngkamin an inbei na zui hle.

AIADMK legislature party hruaitu atana Sasikala-i thlan tlin a nih hnuah Panneerselvam chuan CM aṭanga banna a thehlut a, mahse a hnua Jayalalalithaa-i thlana inngaihtuahna hun eng emaw chen a neih hnuin, thu dik tak puangchhuak turin Jaya-i thlarauin a hrilh niin a sawi a ni. CM aṭanga ban luihtir a ni thu a sawi a, Jaya-i ngei pawhin amah thlaktu atan Sasikala-i a duh lo tih a sawi bawk.

Sasikala-i laka a hel tak vang hian Panneerselvam hi party treasurer aṭangin ban a ni tawh a, mahse Panneerselvam chuan an party dan hnuaiah Sasikala-i hian a nihna aṭang hian a ban ngawt thei lo tih a sawi thung.

Caretaker CM Panneerselvam chuan party dan hnuaiah treasurer a la nih reng avangin a remtihna telloin bank-a party fund chu khawih theih a ni lo tih a sawi a, bank pahnih hnenah pawh hei hi ziakin a thlen nghal a ni. Panneerselvam chuan party dan an hman mek hnuaiah, hruaitu thar thlan a nih hma chuan AIADMK office bearer-te chuan an chanvo chu an la chhelh chhunzawm reng tur a ni, a ti.

Nimin vek khan Panneerselvam chuan Jayalalithaa-i in, Chennai-a Poes Garden Residence chu Jaya-i hriatrengna hmun atana siam turin thupek a siam. He inah hian Sasikala-i hi a la cheng a, hriatrengna hmun atana siam a nih dawn chuan a insawnchhuah a ngai dawn a ni.