Pawisa tih thih hnuah Maoist hel 700 inpe tawh : PM

Prime Minister Narendra Modi-a chuan, nikum November 8-a pawisa note lian pahnih tih thih a nih hnuah Maoist hel 700 chu sorkar kutah an inpe tawh niin a sawi. He thutlukna hi khawvel huap pawha thutlukna lian tham a nih thu a sawi.

Nikum November leh December thla chhung khan Maoist hel 700 hi a inpe a, inpe an la awm chhunzawm zel niin PM chuan Rajya Sabha inkhawmah a sawi.

Narendra Modi chuan Pakistan chu hmelma ram tia sawiin, news channel-ah pawh Rs 500 leh Rs 1,000 note tih thih a nih hnuah Pakistan rama India pawisa lem siamtu pakhat a intihhlum phah thu tarlan a ni, a ti. Pawisa tih thih hian ngaihdan pahnih a siam a, eptu pawl hruaitu lamin ngaihdan hran an neih laiin mipui tam zawk chuan sorkar thutlukna chu an thlawp a ni, a ti.

Pawisa tithih chungchanga sorkarin thutlukna huaisen tak a siam chuan mipuite thiltih theihna a chawikang zawk a ni tiin, he thilin nghawng a neih dante chu zirchian zel a nih tur thu a sawi.