Uphaar fire case : Gopal Ansal-a jail-ah tang leh dawn

Supreme Court chuan kum 1997-a Uphaar Cinema hall-a kangmei chhuak vanga mi 59 thihna thleng chung­chang thubuaiah real estate builder Gopal Ansal chu kum khat lung-in tang leh turin a chungthu a relsak. A unaupa Sushil Ansal erawh chu a upat tawh avangin ngaihnathiam a ni thung.

Jutice Ranjan Gogoi, Kurian Joseph leh AK Goel awmna bench chuan CBI leh Association of Victims-te’n kum 2015 khan Supreme Court thutlukna siam chung­changa petition an thehluh chu an ngaihtuah a ni. Court chuan kangmei chhuaka thi chhungte hnena zangna­dawmna pek tur cheng vaibelchhe 60 chawi tura a tih hnuah Ansal unaute hi a lo chhuah zalen tawh a ni.

Gopal Ansal hi kangmei chhuak chungchang thubuai vang hian thla li leh ni 20 jail-ah a lo tang tawh a, hei hi kum khat tang tura relsakah hian paih tel a ni ang. Kar li c hhung ngeia thuneitute kuta inpe tura hriattir a ni.

Kum 1997, June 13 khan Border film tihchhuah laiin Delhi, Green Park area-a Uphaar Cinema hall-ah kangmei a chhuak a, theatre chhung hi a thim avang leh, tlanchhuahna tur kawngte chu cinemna en tute ṭhutna tur dawhbelhin a dal avangin, mi tam tak innekbuaiin mi 59 an thi a, mi 100 chuangin hliam an tuar a ni. Kum 2007, November thla khan trial court chuan Uphaar neitu, Ansal unaute hi hrehawm taka kum hnih chhung tang turin a relsak a, mahse December 2008 khan Delhi High court chuan an tan hun hi kum khatah a tihhniam sak. Sushil Ansal hi thla 5 leh ni 20 a tang a, gopal hi thla li leh ni 20 a tang hman bawk a, kum 2015 August 19 khan Supreme Court chuan thiam loh chantir an nihna hi pawm mah se, an upat tawh avang leh hun eng emaw chen an lo tan tawh avangin jail-ah dah chhunzawm lo turin a ti a, mahse cheng vaibelchhe 30 ve ve chawi turin a ti a ni.