United Breweries board-in bang turin Mallya a ngen

United Breweries board chuan, bank loan leiba tam tham tak a neih avanga talbuai mek, Vijay Mallya-a chu board chairman a nihna aṭanga banna thehlut turin a ngen.

Securities and Exchange Board of India (Sebi)-in Mallya-a hi security market lama inrawlh a khap avangin United Breweries chuan Nilaini khan board meeting neiin, an chairman hi bang tura phutin resolution an siam nghal a ni. Hemi hnu hian Mallya hi an mail-in an hriattir nghal a ni.

Sebi hian Mally hian United Spirits official hlui parukte chu an sum an tihchet danah dan kalha thiltia puh an nih avangin security market lama an inrawlh a lo khap tawh a, Mallya leh Ashok Kapoor, United Spirits managing director hlui pawh company-a director leh manager post an chelh a lo khap tawh bawk.

Vijay Mallya-a hian bank hrang hrangah loan a puk, cheng vaibelchhe 9,000 chuang zet a la ba a, nikum March thla khan a loan lakna bank-te hian rul tura an nawr avangin India ram a chhuahsan a, Britain-ah a khawsa mek a ni. A loan lakte hi a lakna chhan ni loah dik lo taka hmanga puh a nih chungchanga thu zawhfiah turin Enforcement Directorate-a investigator-te chuan ṭum eng emaw zat inlan turin ko mah se a la inlan duh lo a ni.