Tamil Nadu : AIADMK MLA-te khung beh niin sawi

Tamil Nadu chief minister dinhmun inchuha acting CM O Panneerselvam leh AIDAMK general secretary VK Sasikala-i te inkar buaina kal zelah, rorellai AIADMK MLA tam zawk chu resort-ah midang bepawp thei lo turin khung beh nia sawi a ni a, hei vang hian Madras High Court chuan report ziaklut turin police te a hriattir.

AIADMK hruaitu, Valarmathi chuan resort-ah MLA awmte hian an Panneerselvam-a thlawptu lam aṭangin phone-ah vauna thu an dawng fo a, hei vang hian anmahni duh thu ngeiin an mobile phone te an off zawk niin a sawi thung.

Hetih lai hian Supreme Court chuan Tamil Nadu Chief Minister atana Sasikala-i lakluh tur dang tura ngenna ngaihtuahsak nghal tura ngenna chu nimin khan a hnawl. Chief Justice Jagish Singh Khehar, Justice NV Ramana leh Justice DY Chandrachud awmna bench chuan petition thehlutte ngenna chu a ngaihtuahsak nghal theih loh thu a sawi.

Supreme Court-a petition thehluhah hian Sasikala-i hi a sum lakluh phu loa hausaa puhna thubuai a neih mek avangin CM atan hian lalut rih lo turin an ngen.

CM dinhmun inchuha buaina awm mek chinfel hna chu Tamil Nadu Governor Ch Vidyasagaa Rao kutah a awm tawh a, Governor hian Ningani khan Mumbai aṭangin Chennai a thleng a, Sasikala-i leh Panneerselvam-te pawh a kawm nghal a ni.

Acting CM Panneerselvam chuan AIADMK legislative party atana Sasikala-i thlan tlin a nih hnuah, CM dinhmun kian turin Sasikala-i leh party hruaitu dangte chuan banna thehlut turin an nawr lui niin a sawi. Hetihlai hian Sasikala-i chuan party MLA zingah CM atana duhtu a ngah tawk tih sawiin, amah thlawpttu MLA-te hming ziahna leh signature chuanna pawh Governor hi a pe tawh a ni.

Governor Rao hnenah Sasikala-in list a thehluhah hian a party MLA 134 te hming leh signature a awm a, list-ah hian Panneersevlam-a hming pawh a lang tel a ni. Sasikala-i hi minister 10 in an ṭawiawm bawk.

Panneerselvam chuan Sasikala-in MLA list a thehluh chu siamchawp niin a sawi a, Governor chuan signature-te chu a enfiahtir dawn nia sawi a ni bawk.

AIADMK hian member 235 awmna Tamil Nadu assembly-ah hian MLA 134 a nei mek a ni. Sorkar siam tur chuan member 118 thlawpna neih a ngai a ni.