PM Modi-a bialah Rahul-Akhilesh roadshow neih phal lo

Uttar Pradesh assembly inthlan neih tura campaign neih mekah, Congress leh Samajwadi party thawkdunten Prime Minister Narendra Modi-a Lok Sabha bial, Varanasi-a roadshow neih an tum chu thuneituten an phalsak lo.

Congress vice president Rahul Gandhi leh Samajwadi party hruaitu, Chief Minister Akhilesh Yadav-ten Varanasi-a joint roadshow neih an tum chu Varanasi thuneitute chuan a hmain an lo hnawlsak tawh a, nimina an neih tum pawh hnawlsak an ni leh a ni. Thuneitute chuan nimina party pahnih hruaituten roadshow an neih tum hi Guru Ravidas piancham lawm a nih dawn vangin hnawlsak a ni tih an sawi.

Hetih lai hian CM Yadav-a chuan Minister of State for Higher Education Sharda Prasad Shukla chu inthlanah RLD ticket-a a din dawn vangin Ningani khan minister a nihna aṭangin a ban. Minister Shukla hian inthlan neih turah hian Samajwadi candidate a chang pha tawh lo a, hei vang hian Lucknow-a Sarojininagar constituency-ah Rashtriya Lok Dal (RLD) ticket-in chuh a tum a ni. Governor Ram Naik chuan minister banna hi a pawmsak tawh bawk.

UP-a assembly seat 403 awmnaah hian inthlan hi thawh sarih-a neih a ni dawn a, vawiin-ah a thawh khatna hi district 15 huam chhunga constituency 73-ah neih a ni ang. Inthlan thawh khatna atan hian candidate 839 an awm a, vote nei mi vaibelchhe 2.57 chuang awmin an zingah hian hmeichhia vaibelchhe 1.17 an awm. Vote nei zinga nuai 24.25 hi kum 18-19 inkar an ni.