Majority kan neih hunah women quota bill kan pass ang : Naidu

Union Minister for Information and Broadcasting and Urban Development M Venkaiah Naidu chuan BJP kaihhruai NDA chuan Rajya Sabha-ah majority a la neih loh avangin Parliament leh state assembly-a hmeichhe quota, 33% dahna tur a la tlang thei lo niin a sawi.

Nimina Amaravati, Andhra Pradesh-a National Women’s Parliament (NWP) a thu a sawiah Naidu chuan he thu hi sawi chhuakin, Parliament leh assembly-a hmeichhia quota dahna tur dan siam chu Parliament-ah pass a la ni thuai dawn a, hei hi Prime Minister Narendra Modi pawhin a vei hle a ni, a ti.

Minister chuan, “Rajya Sabha-a majority kan neih veleh he bill hi kan pass nghal dawn a ni” tiin, mipuite rilru sukthlek pawh tihzauh a ngaih thu a sawi. He bill hi kum 2010 khan Rajya Sabha-ah pass a ni tawh a, mahse Lok Sabha-ah dan a nih avangin a tlang thei ta lo a ni.

Naidu chuan hmeichhe quota dah tur chu hmeichhiate dinhmun chawikanna tura hmalakna kawng khat a ni tih a sawi a, economy, education leh sector dangah pawh hmeichhiate thuam chak an nih tur thu a sawi bawk. Hmeichhe dinhmun chawikanna turin hmeichhiaten self-help group an din chu hmanraw pawimawh tak a ni, a ti.