CBI-in thamna laa puh chungchangah Chidambaram fapa Karti in leh office an dap

Union minister hlui P Chidambaram-a fapa, Congress MP ni lai Karti Chidambaram-a in leh office chu nimin khan Central Bureau of Investigation (CBI) thamna laa puhna kaihhnawihah an dap sak.

Chennai, Mumbai, Odisha leh Delhi-a Karti Chidambaram leh a thawhpuite in leh ofice pasarih chu CBI hian an dap a ni.

Investigative agency hian kum 2010-14 chhung khan Punjab-a power project-a thawk turin China mi 250-te visa laksakna turin thamna, Rs nuai 50 a dawng nia puhin, Karti Chidambaram lakah hian thubuai an ziaklut a ni.

Nimin zing khan Delhi-a Chidambaram-a chenna, 80 Lodhi Estate chu member pasarih awmna, CBI team chuan dapin, he inah thawk pakhat chu thu an zawhfiah a, lehkha pawimawhte pawh an la nia sawi a ni. In an dap lai hian Karti Chidambaram hi inah a awm lo. He thil thlen hnuah hian Karti Chidambaram chuan a twitter-ah vawi eng zatnge a in an dapsak hi a hriatsen tawh loh thu a tarlang.

Chidambaram hi case eng emaw zatah chhui mek a ni a, heng zingah hian INX Media hnen aṭanga Foreign Investment Promotion Board (FIPB) clearance tihna tura Rs vbc 305 dawnga puhna pawh a tel. Kum 2017, May 15 khan CBI hian eiruk thubuai a siamsak a, Enforcement Directorate (ED) pawhin dik lo taka sum dawnga puh chungchangah thubuai a siamsak tawh bawk. Kum 2018, February thla khan CBI chuan Karti Chidambaram hi an man a, thla khat hnuah bail-a chhuahtir a ni.