Amit Shah hoin JK chungchangah high-level meeting nei

Jammu and Kashmir-ah tun hnaia inthahna thleng fo avangin union home minister Amit Shah hoin, nimin khan security dinhmun thlirin high level meeting neih a ni.

High-level meeting-ah hian J&K Lt governor Manoj Sinha, union home secretary Ajay Bhalla bakah intelligence leh security agency hotute an tel. Security chungchangte an thlirho bakah, June 30 aṭanga neih ṭantur, Amarnath yatra atana inbuatsaih dante an thlirho bawk.

May 12 khan Budgam district-ah Kashmir Pandit, sorkar hnathawk pakhat chu a office chhungah firfiakten an that a ni. He thil thlen tukah hian police constable Reyaz Ahmad Thokar chu Pulwama district-a a chenna inah firfiakten an kaphlum leh bawk. Kar liam ta khan Jammu-a Katra bulah khualzinte chuanna bus a kang a, mi pali thiin midang 20 in hliam an tuar leh bawk a ni. Police-te chuan sticky bomb hmangin bus hi tihkan niin an ring.

Hri leng vanga kum hnih chhung neih theih loh a nih hnuah, kuminah Amarnath yatra hi neih a ni dawn a, June 30-ah ṭanin, August 11 thleng neih a ni ang. Yatra-ah hian mi nuai thum chuang an kal beisei a ni a, tun hnaia pawikhawihna thleng fo avangin venhimna lam pawh uluk zawka kalpui dan ngaihtuah a ni. Sorkar venhim hna thawhnaa Jammu and Kashmir police-te pui turin paramilitary force 12,000 vel a tir dawn a ni.